فكرة مبتكرة للدعاية والإعلان ..إنتظروني انا ودعلج في نهائي كأس العالم بروسيا 2018 !!

الجمعة, يوليو 18, 2014 - 21:07

بنهائي كأس العالم 2014 بين ألمانيا والأرجنتين صار موقف غريب وسط المباراة تجاهله المخرج كن ماصا رشي وما حبّ ينقله عالهواء مباشرة عشان ما يعطي هالحدث زخم وشهره .. ولكن عدسات المصورين إلتقطت كل التفاصيل ووقتها محد كان فاهم السالفه .. لكن بعد كم يوم تبقّشت الأمور وعرفوا الناس السالفه .. اللي هو الشخص اللي طبّ الملعب وصار يراكض بين اللاعبين وهو رافع فنيلته ومطلع بطنه وصدره .. من هالشخص ووش يبي ؟ هذا شخص روسي الجنسيه إسمه فيتالي .. كوميدي مهبول من الطراز الأول .. عنده قناة في اليوتيوب لها أكثر من 6 مليون متابع .. جت برآسه فكرة انه يسوي دعايه للقناة حقته وما لقى أحسن من هالفكره انه يطب الملعب وهو كاتب إسم مسلسل بالقناة حقته على بطنه .. وقبلها كتب بتويتر (شاهدوني في النهائي) ومحد فهم وش قصده لكن سواها ذيبان ما عاقت معه .. صح إنه تمرمط وهو يراكض وطاح كم مره وتشقلب بالملعب ثم قفطوه الرجاجيل .. وكل الجماهير والمنتخبات غادرت البرازيل إلا هو الظاهر للحين ناطلينه بالسجن بس ما عليه .. الرجال مطنوخ وقادح وقول وفعل .. الفكرة ممتازه صراحه .. دعايه مجانيه وبمجهودات ذاتيه بدون عقود وتدفع مبالغ خياليه لكن بتدفع كم يوم من عمرك في سجن او حجز شرطة لين يخيب ثناك ثم تطلع .. لذلك إنتظروني في كأس العالم بروسيا 2018 أنا ودعلج نراكض وسط الملعب بالنهائي مطلعين بطوننا وكاتبين (ياخبر) .. انا بكتبها بالعربي ودعلج بالإنقليزي .. بس انا بكتبها تحت في آخر البطن عشان ما تغطي عليها ديودي وهي ترجّ مع الركض .. وعشان نلخم رجال الأمن كل واحد مننا بيدخل مع جهه .. منها نلخبطهم ويضيعون معد يدرون من يلحقون الأول .. وثانياً عشان ما نتصادم وحنا نركض لو دخلنا الملعب جنب بعض اعرف دعلج اذا ركض كنه حاشي منطلق يمشي ويرجّف من طول رجلينه .. وبعلم امي واهلي انهم لا يحتروني عقب الونديال على طول .. أبتأخر هناك كم يوم عندي كم شغله بخلصها في روسيا .. وهات لك أطلق دعايه مجانيه !!

http://yakhabar.com/post/305281

اضف تعليق

CAPTCHA
This question is for testing whether or not you are a human visitor and to prevent automated spam submissions.