لسلامتك .. سافر بدون عفش (إذا أنت جاي للرياض) !

السبت, يوليو 26, 2014 - 01:04

واحد من العلماء والمفكرين على مستوى كبير .. سألوه عن قاعده أو نمط معين يساعدهم بالحكم على تطوّر الدول وتصنيفها سواءً متقدمه أو ناميه أو متخلّفه أو جايبه العيد ومالها سنع .. قال بإختصار أسهل وأحكم طريقه وأكثرها دقه هي (أول خطوه لك في هذه الدوله ) .. يعني تقدر تآخذ الحكم الكامل عن الدول من خلال (مطاراتها) وهي تعبّر بإختصار عن اللي بيواجهك أثناء إقامتك في هالدوله .. عز الله إنه ذيبان وحكيم بس ما إرتحت له صراحه أحس إنه يدق بالحكي أو لو اللي سأله لزّم شوي وطلب تفاصيل بيقول له : يخوي رح للي تبي وإنتبه تطبّ السعوديه وأمورك طيبه ! هالأيام تكدّس بشري هائل في مطار الملك خالد الدولي بالرياض .. ويجدر التنويه بأن الرياض هي (عاصمة) المملكة العربية السعودية وهذا المطار الوحيد فيها .. حبيت أذكركم يمكن ناسين أو شي .. سبب التكدّس هو تعطّل سير الشنط .. يعني توصل أنت بالسلامه أوكي بس ما نضمن عفشك يوصل أو لا .. وإذا أنت شايب أو نحيف وقزم إطلب ربك .. لازم تكون نشيط ومهبول ومتعافي عشان تداحم خلق الله وتوطّي الكراتين والشنط لين توصل عفشك .. وأتوقع أن نظام التساهيل عندنا مستقبلاً بيوصل لمرحلة إنك تآخذ أي عفش قدامك بنظام حقرا بقرا موب لازم تتعب نفسك وتحتري عفشك الصدقي .. أو بيحطون ضمن الشروط إنك تسافر بدون عفش .. أو بيركبون شبك على تندة الطياره وكلن يرقى يحط عفشه ويربّطه قبل تقلع طيارتهم زي نظام الباصات أيام أول .. كل هذي حلول واردة وممكن يسوونها بس أنا متأكد إن موب من ضمن الحلول (إنهم يصلّحون سير الحقائب) ويجيبون واحد جديد !!

http://yakhabar.com/post/305311

اضف تعليق

CAPTCHA
This question is for testing whether or not you are a human visitor and to prevent automated spam submissions.