عزيزتي الحكومة : اللهم اخرب بيتنا عشان ترتاحي

الخميس, مايو 14, 2015 - 13:37

عزيزتي الحكومة :
حقك علينا .. و ربنا ما تاخدي على خاطرك و لا تزعلي نفسك .. ربنا ياخدنا عشان ترتاحي و تصحي الصبح متلاقيش حد تحكميه . أو تستوردي شعب حلو كده و نضيف و مستحمي .. صحيح ابن زبال ايه اللي يشتغل في لامؤاخذة القضاء .. اسفوخس على دي فكرة .. و نوبيين ايه اللي عايزين حقوق من سيادة وزير الزراعة و نعناع الجنينة هناك مدلدل على حيطانهم .. بلاش افترا .
و شباب ايه اللي عايزين شغل و احنا عندنا العيل طبقا لوزير الرياضة بياخد 3 آلاف جنيه .. آه و الختمة الشريفة قال كده .. يمكن يقصد في بنك الحظ .. احنا هانعرف أحسن من الحكومة ؟؟ 
شعب مفتري خرسيس أدب يوك .. بس حضرتك معلش محتاجة الشعب ده عشان لامؤاخذة يشيل زبالتكم و ينضف بيسيناتكم و يسوق عربياتكتم و يطبخ لعظمة حظرتكم و موظفين في دولة فخامتكم و دكاترة لو من باب التغيير قررتم تتعالجوا في مصر و مهندسين و عمال يبنوا قصور معاليكم .. و ندفع ضرايب نملا خزانة دولتكم الموقرة .
فمعلش استحملونا شوية .. و نوعد معاليكم اننا هانحاول نبلع الحلاوة اللي بتأكلوهالنا في اعلامكم الموقر و نعيش في الطراوة اللي بتوعدونا بيها . 

http://yakhabar.com/post/566516

اضف تعليق

CAPTCHA
This question is for testing whether or not you are a human visitor and to prevent automated spam submissions.