رسالة لعمو الإرهابي

الخميس, أغسطس 20, 2015 - 19:24

Mostafa Nasr

السيد الفاضل الإرهابي صاحب التفجير
تحية طيبة وبعد
ارجوا من سيادتكم عدم تفجير المباني والمنشآت الحكومية لانها بتتبني تاني من جيب اللي خلفونا مش من جيب اللي خلفوك .
كما أودّ ان ألفت نظر سيادتكم الى ان تفجرياتكم جميعها في المناطق والأحياء الفقيرة حيث عامة الشعب يسكنون ودول والنعمة الشريفة مالهمش دعوة بالسياسة خالص دول حضرتك لو مسكت الحكم لاقدر الله هينزلوا يهيصولك في الشارع وعندهم اوبشن نعم على اي انتخابات او استفتاء هتعمله سواء انت او غيرك بليف مي
كما أودّ الاشارة الى عدم وجود تنسيق إعلامي مع الجهات المختصة ياعني لوحضرتك فجرتني انا شخصيا مش هقدر اكتب على الفيس انك فجرتني ولا هقدر انزل صورة سيلفي ليا وانا متفجر الا بعد ان يصدر بيان رسمي من السيد المسئول طبقا لقانون الارهاب الجديد وحضرتك عارف ان المسؤولين بيقولوا تليفوناتهم بالليل وبيقفلوا الشبابيك علشان التكيف فمش بيعرف بالانفجار غير تاني يوم لذا ارجوا التنسيق مسبقا معهم
اما بخصوص السادة اصحاب نظرية الله يخرب بيت معبر رفح احب ان ألفت نظركم الى ان اي حد بيعدي من المعرف بيكون مسجل لدى السلطات ومعروف مين دخل ومين خرج ده معبر دولي مش معبر قاعة سينما كمان لازم تفهم ان المعبر ممكن يعدي ارهابي بالغلط انما مش هيعدي طن متفجرات مثلا شغل مخك شوية
اما بخصوص السادة المتضررين من التفجيرات صدقني مانزعلش بص لنص الكوباية المليان
اولا انت هتلاقي حاجة تهري فيها وتحكيها لاولادك ًأحفادك من ضمن قصص الاكشن بتاعتك بدل ماتقعد تألف قصص وتفتي وتاخد سيئات اديك هتحكيلهم حاجة حقيقة وهتاخد حسنات .
ثانيا علشان لو ماموتش او اتشليت تحمد ربنا انه نجاك والحمد عليه حسنات .
ثالثا اخى الفاضل عندما تنظر الي أضرار التفجير وتقارنها بتفجيرات الدول الاخرى ستجد حتما اننا احسن من سوريا والعراق .
رابعا ان تشهد معجزة تاريخية لا تحدث الا في مصر حيث التفجير يقع في شبرا الخيمة وتسمعه انت في المعادي على بعد ٧٠ كيلو متر ودي قمة الإعجاز التفجيري
حفظ الله مصر والنادي الاهلي وعم سعيد طرايبك

http://yakhabar.com/post/594036

اضف تعليق

CAPTCHA
This question is for testing whether or not you are a human visitor and to prevent automated spam submissions.